У Бярэзінскім біясферным запаведніку маніторынг жывёльнага свету ўключае некалькі відаў штогадовых уліковых работ. Найважнейшым з іх з'яўляецца зімовы маршрутны ўлік (ЗМУ), падчас якога адначасова вызначаецца колькасць цэлага шэрагу відаў звяроў.
Зімовы маршрутны ўлік праводзіцца з году ў год, як правіла, на адных і тых жа маршрутах, што дазваляе атрымаць параўнальныя дадзеныя.
Падчас цяперашніх зімовых улікаў работнікамі лясной аховы запаведніка пад кантролем і з удзелам супрацоўнікаў навуковага аддзела было пройдзена больш за 50 маршрутаў, агульнай працягласцю каля 550 км!
Маршрутамі былі ахоплены ўсе найважнейшыя лясныя, лугавыя і балотныя біятопы. Ўмовы надвор'я для правядзення ўлікаў былі спрыяльнымі. Дзякуючы адлігі, якая надышла у лесе, снег значна асеў, што вельмі станоўча паўплывала на актыўнасць жывёл.
Папярэдні аналіз вынікаў палявых уліковых работ паказаў, што асноўная колькасць слядоў дзікіх жывёл сканцэнтравана ў пойме ракі Бярэзіна. Паўсюдна на тэрыторыі запаведніка адзначаны сляды лася, аленя, казулі, ваўка, зайцоў, вавёркі, куніцы, практычна ва ўсіх лясніцтвах зафіксаваны сляды рысі.
На тэрыторыі Зарэчнага лясніцтва ў паўднёвай частцы запаведніка ўлікоўцамі былі выяўлены сляды мядзведзя, а ўлікоўцу ў Бярэзінскім лясніцтве буры мядзведзь трапіўся на вочы. З гэтага вынікае, што вясна не толькі каляндарная, але і ў жыцці дзікіх насельнікаў запаведніка ўжо наступіла. Неабходна адзначыць, што гэты год, дзякуючы высокаму снежнаму покрыву, аказаўся больш спрыяльным для зімовай спячкі бурага мядзведзя, і тэрміны яго з'яўлення пасля спячкі цалкам адпавядаюць сярэднім шматгадовым.